📅 2025 жылғы 15 қыркүйек
📍 Қызылорда

Қызылорда облысының мәдениет, архивтер және құжаттама басқармасына қарасты Әбділдә Тәжібаев атындағы Қызылорда облыстық әмбебап ғылыми кітапханасы мен Қазақстан және Орталық Азия тарихын зерттеу институты арасында өзара ынтымақтастық туралы меморандумға қол қойылды.

Бұл құжат аймақтық тарихи-мәдени мұраны сақтау, ғылыми айналымға енгізу және білім беру-ағартушылық салаларындағы серіктестікті дамытуға бағытталған.

Меморандум аясында тараптар келесі бағыттар бойынша бірлесіп жұмыс істеуге уағдаласты:
• аймақтық тарихқа қатысты сирек кітаптар мен қолжазбаларды анықтау, зерттеу және жариялау;
• кітапхана қорындағы материалдарды цифрландыру және ғылыми орта мен көпшілікке қолжетімді ету;
• жас зерттеушілерге, магистранттар мен докторанттарға арналған тағылымдамалар мен ғылыми жобалар ұйымдастыру;
• бірлескен конференциялар, дөңгелек үстелдер, әдеби және тарихи кездесулер өткізу;
• ғылыми мақалалар мен жинақтар шығару, ортақ басылымдар әзірлеу.

Қол қою рәсіміне Қазақстан және Орталық Азия тарихын зерттеу институтының бас директоры Самат Жұматай, сондай-ақ Қызылорда облыстық кітапханасының басшылығы қатысты.

Шара барысында тараптар екіжақты әріптестіктің маңыздылығын атап өтіп, бұл құжаттың аймақтағы тарихи мұраларды кешенді зерттеуге, халық игілігіне қолжетімді етуге, сондай-ақ ғылыми және мәдени жобаларды жүзеге асыруға кең жол ашатынын жеткізді.

🔗 Жасалған серіктестік ұлттық тарихты тереңірек танып-білуге, рухани қазынаны сақтап, келешек ұрпаққа жеткізуге және жас ғалымдардың кәсіби дамуына үлкен мүмкіндік береді.